Egipto Afrikako kontinenteak euskal enpresentzat eskaintzen duen helmuga erakargarrienetako bat da. Bere ekonomia Afrikako bigarren garatuena da. Baina ez hori bakarrik, bere kokapen geografikoak, Afrika eta Ekialde Ertainaren artean, berdinik gabeko pasabide eta munduko funtsezko bi guneren arteko lotura bihurtzen du.
Era berean, ezin dugu ahaztu Suezko kanala, munduko itsas merkataritzaren % 10 bertatik igarotzen den gune estrategikoa. Kanalak Mediterraneoa eta Itsaso Gorria lotzen ditu, eta horrek Europa eta Asia arteko itsas garraioa bizkortzea ahalbidetzen du, Afrikako kontinente osoa inguratu behar izatea saihestuz.
Covid-en oldarraldiari aurre egin dion herrialdea
“Biztanle gazteei esker, Egiptok erresilientzia erakutsi du Covid-19aren shockaren aurrean, baina erronka handiak daude oraindik”, adierazi du Akram El-Hosseiny Basque Trade & Investment-eko aholkulariak Egipton. Egiptoko gobernuak azken urteetan bultzatutako erreforma makroekonomikoek ekonomia egonkortu dute, Covid-19aren krisitik irtetea ahalbidetu dute kontu fiskal hobeekin eta dibisa-erreserben maila nahiko zabalarekin. Errealitate horrek Egipto sendotu du Afrikako kontinente osoko bigarren ekonomia gisa.
Egiptoko Gobernua 2030erako Ikuspen Plana garatzen ari da, herrialdeko ekonomian hazkundea eta partaidetza pribatu handiagoa sustatzeko helburua duen programa integrala. Zehazki, Egiptoko industria modernizazio- eta berregituratze-prozesu betean dago.
“Energiaren sektorearen erreformek elektrizitatearen hornidura eta gasaren esportazioak bultzatzen lagundu zuten. Energiaren merkatua jarduera pribatura zabaldu zuten eta berriztagarrietan inbertitzea sustatu zuten “, azaldu digu El-Hosseinyk. Egiptoko ekonomia gero eta gehiago dibertsifikatzea atzerriko esportazioetarako aukera-leihoa da. Errealitate berri horrek aukera ematen du makinak eta, oro har, ekipoak esportatzeko. Energia, eraikuntza, garraio-azpiegitura, uren tratamendua, berriztagarriak eta hiri-garapena dira bertan inbertitu nahi duten euskal enpresei sarrera eman diezaieketen sektoreetako batzuk.
Esportaziorako erraztasunak
Baina Egiptoko enpresa esportatzaileen interesak zerbaitek indartzen baditu, merkataritza librerako abantailak dira. Akram El-Hosseinyk dioen bezala, “Egipto 100 milioi pertsonako merkatua da, eta merkataritza libreko akordioak ditu, bloke ekonomiko askorekin, Europar Batasunaren kasuan bezala”. Egoera horri esker, euskal enpresa askok Egipton jarri dute fokua, eta bereziki interesgarria da nekazaritza, akuikultura, energia berriztagarriak, oil & gasa, kimika, metalurgia edo eraikuntzako makineria bezalako sektoreentzat, besteak beste.
Cámarabilbaok Egipton helmuga izango duen Merkataritza Misio bat egingo du datozen egunetan. Herrialde afrikarrak bizi duen egoera sakonago ezagutzera emateko, datorren maiatzaren 20an Egipton oinarritutako jardunaldi bat ospatuko du Akram El-Hosseinyk, Basque Trade & Investment-eko aholkulariak, Egiptoren merkatu egoeraz eta epe ertainerako perspektibez hitz egingo duelarik. Egun hori ezin duzu galdu herrialde honetan merkatu-prospekzio bat egitea pentsatzen ari bazara.
